بحبك .. وإنطلق عصفور

يا بسمه بتحلى مرار ايامي

يا نور احلامي

يا ورد منسم

فعنيكي الحزن متبسم .. ومتلون
بـ 100 ضحكه
وانا مصمم
ولو همشي ف 100 سكه
انا مكمل
ولو ها اتعب ، وما من سكتك اصعب
ولو عالناس انا ها اصعب
ولو فوشوشنا تتقفل ، ما نيش مالل
وها اخدك عالحصان واهرب .. وها نكمل
نتوه في الدنيا وتساعنا ، وتسمعنا
ونشجيها بأغانينا ، واحلامنا ما توجعنا
وتبقي خطوتي وضلي
وتمشي طريقي بالملي
ولا تثوري ولا تملي
وأتوه فعنيكي واتداري
ويشرق فرحنا عالكون
يا ست الكل يا أميرتي
دا لجل عنيكي كله يهون
وانا مجنون
ومستبيع
وبتلوع
من الاشواق فبعدك لما تجافيني
ولما بتيجي وتجيني
ببص لرمشك السهتان
يدفيني
وانا بردان
يطمني عليكي فحضني
يواسيني
يوديني
بعيد بيكي
تتوه بينا
ليالي الشوق تودينا
وتجيب فينا
ما نعرف معني للساعات
ولا ايام ولا اوقات
ولا مواعيد
ما كل العمر فإيدينا
ها نسأل ليه عن التوقيت
مادام احلامنا مـ الدنيا
بتحقق سوا لينا
على ايديكي وانا ليكي
وانا بيكي وانا فيكي
وساكن نبض شريانكِ
وساكنه فروحي وضلوعي
وساكنه وريدي ودموعي
وكل قصايدي علشانكِ
وانتي البسمه على ثغري
وانتي فعتمتي شموعي
وانتي الحزن متبسم فأيامي
يا ست الحسن يا قريبه
يا نبض القلب يا حبيبه
يا ضي لفكري ولبالي
يا صاحبة المقام عالي
عشان غاليه
بشوفك نجمه في السما وعاليه
وبصالي وندهالي
و بتوسل
انا العطشان ما ترويني
بضحكة ثغرك الوردي
أمانه تقبلي وَردي
ومهري حروفي وقصايدي
وبوسه بشوق على جبينك
مقابل ضحكه من عينك
بكل كسوفها عشقاني وريداني
وماحيه كل احزاني
اتموطح بيها واتعايق في كل الكون
يا ست الكل يا روحي
دا لكل عنيكي كله يهون
وانا مجنون
تعالي فحضني واترتاحي
لجل جراحي
ما تسيبني
واحزاني ما تغلبني
ونامي فكفي
واتدفي
دا حب الدنيا ما يكفي
ولا يوفي
بأشواقي
يا ست الكل
يا كل الكون

يا نجمه في السما بتلمع
دا لجل عنيكي كله يهون
وانا مجنون
ومستبيع