ارحـــــل

ساعات بنقابل اغنية تخطفنا كدا من اللي احنا فيه وتعيشنا فجو ملوكي ,

 تهزك من جواك وتعرفك معاني لحاجات يمكن قبل كدا ما كنتش تعرف

معناها الحقيقي , وتعيشك فأحاسيس يمكن بتفتقدها او مشاعر عالية

 تحسسك بالدفا من جواك ، وتلاقي تركيبة الأغنية على بعضها

 كلماتها بالحانها بصوت اللي بيغنيها حاجة كدا وهم .

الموسيقى بتغذى الروح وبتملاها وساعات بطريقة او باخرى بتكون

أداة تفريغ للمشاعر , والكلمات معانيها ساعات بتلمسنا وتهزنا ,

 وصوت المغني هو اللي بيمزج الكلمات بالالحان ويكمل اللوحة دي ..

فلما أتكلم على أغنية من كلمات الرائع " جمال بخيت " ،

ومن ألحان المبدع " احمد الحجار " وغناء الراقي " على الحجار "

بصوته المليان قوة وشجن يبقى الأغنية دي غير ..

الأغنية مقدمتها الموسيقية تخطفك من اي مود انت فيه وتدخلك لجو الأغنية

اللي من بدايتها مدي على حزايني .. فجأة تلاقى على الحجار بيبدأ الأغنية

 بكلمة " بحبك "  ،  الله !  كلمة اد ايه عالية اوي , 4 حروف جواهم اسمى

 معاني الوجود , كلمة مقدسة ليها شروطها وتضحياتها وإثباتاتها

وتنازلاتها , قليل من البشر اللي يقدر معناها !

تاني شطر في الاغنية جملة عبقرية من جمال بخيت  :

" واملا الكون بأغانيا ولو كان الجناح مكسور " ، ويجي فـ تاني كوبليه

يقولك " أحبك .. تستكين الريح فقلبي " عالية اوي دي ..

ويختملك الأغنية الرومانسية اللي اللحن وصوت على الحجار اضفو عليها

 حزن وشجن بتوحي بيه بعض الكلمات في الأغنية وكأنها أنشودة لعاشق يائس بيدي نفسه الامل في عشقه بشطرين كلهم أمل ولا اروع ويقول :

أحبك .. ضي روحي يبان
وأعبر ضلمة الحرمان
وأهجر غابة الأحزان
وأحقق حلمنا المسحور

"وأحقق حلمنا المسحور " بتحدي العاشق الصادق قال " أحقق " بمفرده ..

ولما ذكر الحلم قال " حلمنا " !
"وأحقق حلمنا "  حقاً للعشق معاني قليلا من يعيها وقليلا من يوفيها حقها  ..

أغنية تركيبة فريدة وحالة خاصة رائعة بحق ..

بحبك

 وأنطلق عصفور
وأسبح في الهوا والنور

وأملأ الكون بأغانيا
ولو كان الجناح مكسور

أحبك
تستكين الريح ف قلبي
والأماني تصيح بحبي
وأعشق التصريح
ودربي
ف الضباب مغمور

أحبك
تبتدي البدايات
تاخدني ضحكتك بالذات
تعيدني
روح.. وقلب.. وذات
تزيدني كشف للمستور

أحبك ..

ضي روحي يبان
وأعبر ضلمة الحرمان
وأهجر غابة الأحزان
وأحقق حلمنا المسحور

الأغنية لعلى الحجار -من هنا- ا
كلمات جمال بخيت

 الحان احمد الحجار
وهنـــا غناها منير