بحبك .. وإنطلق عصفور

قبل ما نعمل #ثورة 

محتاجين نفهم الناس انهم محتاجين ثورة فعلا

وانهم لهم حقوق وحريات وكرامة ، وان في ناس ضاحكة عليهم وبتسرقهم فعلا 

وان في ناس واكلة حقوقهم ، وبتنصب عليهم 

محتاجين نثبتلهم ان هما بني ادمين بالدرجة الكافية اللي تستحق تعليم كويس ومستشفيات نضيفة وخدمات ومرافق ومعاملة آدمية 

محتاجين نوعيهم ان انسايتهم ما تسمحش ابدا انهم يرضو بلقمة من الزبالة وقت اما يجوعو ..

محتاجين نثبتلهم ان لو مافيش فساد وسرقة وفي مسئولين بيتقوا ربنا مش هايبقي في فـ بلدهم جوع ولا فقر ولا جهل ولا امراض ولا بطالة ولا بلطجة ولا تخويف للناس ولا تغييبهم بالدرجة اللي احنا عليها دلوقتي 

3/4 الشعب مغيب ( سياسيا ) عشان نظام الدولة البوليسية و امن الدولة عايزهم كدا 

3/4 الشعب جاهل ( معرفيا ) و ( ثقافيا) وكتير منهم ( علميا ) عشان المنظومة الفاسدة عايزاهم كدا 

3/4 الشعب ( ما يعرفش حاجه ) عن الدين ولا الأخلاق عشان اتربي على فن واعلام الدعارة والخطب الدينية المختومة من مكاتب امن الدلة 

محتاجين نخلي الناس تخرج بره نفسها و تبص حواليها :

- لو انت شغال في غيرك كتير مش لاقيين شغل ومرمين عالقهاوي بسبب الواسطة والكوسه والفساد الادارى 

- لو انت سليم في غيرك كتير عندهم امراض ما يعلم بيها الا ربنا من مبيدات مسرطنة استوردها وزير حرامي واغذية فاسدة استوردها رجل اعمال ماعندوش ضمير عشان يوفرولهم كام مليون جنيه 

- لو انت لاقي تاكل وتشرب في غيرك كتيير مش لاقيين اللقمة الحاف عشان مسئولين بلدك معظهم حرامية وواكلين حقوق الغلابة 

- لو لاقي سكن كويس ليك ولعيالك غيرك كتير مش عارفين يتجوزو عشان مش قادرين على تمن شقة اوضه وصاله عشان اراضي الدولة بتباع لرجال الاعمال بـ 10 قروش وبعدين يرجعو يبيعوها شقق بالملايين 

- الدولة ناهبها عصابة حرامية وبيقسموها ما بينهم لو انت طايل منها شوية فتافيت فبص لغيرك اللي بيدورو على اللقمة في الزبالة من الجوع وبيتسولو القرش من الفقر ومرمين في الشوارع وعالارصفة ومنهم اتحولو لبلطجية اما لقوا ان ما فيش حد حاسس بيهم فبيثبتولك انهم عايشين وموجودين وليهم حقوق مجتمعهم اضطرهم انهم ما يخدوهاش غير بالسرقة والبلطجة ..

شعب بيتسرق وبيتنهب وبيتهان وبيجيب اللقمة بطلوع الروح ، والتعليم المجاني اللي الدولة بتمن عليه بيه هو السبب في جهله ! ، والتامين الصحي اللي الدولة بتشحتهوله هو اللي جابله امراض الدنيا المستعصية ، والمرافق والخدمات اللي بتديهاله بتبيعاهله اغلى من السعر اللي ممكن تصدرها بيه وكانه سايح ! ويوم ما يفكر يتكلم او ينطق تنهش فيه كلاب حراسة السلطة ويتبهدل هو واهله ..

شوفت ايه حلو من نظام مبارك عشان تبكي عليه ؟! 

ايه اللي عاجبك في نظام مبارك عشان تمسك في عمرو موسى وشفيق اللي من ريحته وتقول انا عايزهم يحكموني ؟! 

شوفت ايه غير القمع والحديد والنار المحاكم العسكرية للمدنيين من دولة بوليسية و حكم عسكري بقاله 60 سنة عشان تقول انا عايزهم يحكموني 60 سنة تاني ؟! 

شوفت ايه حلو من نظام مبارك عشان تفرح ببرائته ؟!

مش ها اقولك تعالى نعمل ثورة وكل الفساد دا ها يختفي وحالك ها يبقى

احسن .. لأ 

هااقولك انت محتاج تعمل ثورة على نفسك وتعمل refresh لآدميتك وتقتنع انك انسان حر وعندك كرامة وماتقبلش بالذل ولا ترضي عن الظلم والفساد 

وتتقي الله فنفسك وفينا .. وتخليك واثق انك تستحق احسن من كدا 

ولو مش حاسس بان في فساد او ظلم او سرقه عشان لاقي تاكل وتشرب دلوقتي 

فخلي بالك الحرامية الكبار فاكرين البلد دي بتاعتهم هما بس ، فاللي بيسيبوهولك دلوقتي مش ها يسيبوه بكرا لولادك ;

فا متخليش ميراثك لعيالك ظلم وفساد وفقر وجهل وجوع وامراض وخوف .. !