بحبك .. وإنطلق عصفور

يحكى ان
كان ياما كان
كان في ثورة فوسط ميدان
وسط عساكر امن وشوم
ودخان
مسموم
ورصاص
ولصوص عاملين حراس
وملايكه على ايديها كفنها
بتطالب بحقوق الناس
ركب الثورة ندل
وخانها
على دم ملايكتها
وداس


يحكي أن وفيما يقال
إن هؤلاء الأندال
باعوا الثورة
بربع جنيه
وحته كرسي قعدوا عليه
وحتة عضمة
وربع رغيف
وكرسي معسل لاجل الكيف
وربع من السُلطه وحشاكلها
- ونفض للامه ومشاكلها -
وحبة مـن الثورة ومكاسبها
واقسَم بالكعبة ما ها يسيبها
واقسَم بكل يمين يلقاه
الا يخالف شرع الله
وألا يقوم من عالكرسي
ولو بالطبل البلدي يا محلاه


ويحكي أنُ
وفيما بعد
بعد جدال عملوه مع بعض
وبعد لجان
وشعوذة
ولجوء للجان
خلصوا الي هذا البيان :
باسم الله
النافذ امره
باسم الشعب
المغلوب على أمره
باسمنا نحن بدون القاب
بدون مغالاه
فيما لا يخالف شرع الله
قررنا الآتي :
1
فـ الداخليه فميش خرطوش
وعليه
اللي يقرب منها
يستاهل ضرب البرطوش
علقوا امه من رجليه
2
بلد البالة
كلها رجاله
وعليه
زي ماقالها سعادة البيه
حادثه عادية
فكل الافلاك الكونية
بس لاجل كرم معالينا
لكل قتيل 100 الف جنيه
3
على ثوار البرلمان
التحلي بأخلاق الميدان
وبناءً عليه
على كل الاحرار
الاعتذار لكل حمار مش حمار
وعدم سب قاتلي الثوار
وعدم المزايدة على الوطنيه او الحرية
او الاسراف في الطعمية
او الاخذ من الدين شعار
والاكثار من الاستغفار
والصلاة على المختار
وان لا حرج من ان يدخل الهولز في الحوار
والحذر كل الحذر
من المساس او التعرض لأي حمار
وعدم الخلط بين الكوسه
وشوربه الخضار

..

انتهي البيان
واي كلام فيه بان
اعتبروه ما بانش
وكل الكلام ما اتقالش
ولا اكنكوا سمعتوني
وحتى لو سألوني
هاقول دا طيش شباب
ولو ودا يوم او جاب
اهو ابقوا
قابلوني