بحبك .. وإنطلق عصفور

يا بنت الإيه

يا قمراية

يا ضحكايه

يا طفله صغيرة

جريئة

يا ساهية وداهية

وبريئة

أنا عايزك

و محتاجلك

كما حكتيلي عن نفسك

كما رأيتك في حكاويكي

كما سمعتك في غناويكي

كما شوفتيني وانا شوفتك

كما صورك ما اهي بتحكي

يا بنت الإيه

وشوفتك عيله في العيد

ولابسة الشنطه بضفيرتين

وقاعدة ممددة في الأرض

بتاخدي صورة وسط الورد

وراسمة ضحكه واكله الخد

تقولش فلة وسطيهم

يا بنت الإيه

غَلَبتيهم

أيا وردايتي ... يا فله

يا سكر كان .. صَبح لولّه

دا مُر الحلق سكرتي

وضلمة قلبي نورتي

..

لجوا الصورة شاورتلي

شايفني كنت ماسكه ايه ؟ .. دا انا بندُغ لبان هارتي

وماسكه فإيدي صُفارتي

يا بنت الكلب عششتي

وقَفِلتي

وتربِستي بيبان هارتي

ورتبتي

وروقتي

وبخرتي شراييني

بقيتلك قوضه مفروشه

وبقيتي انتي بطاطيني

واصبحتي انتي من طيني

وكفرتي ايماني ومَيتيني

بقيتي ليا كالنقمة وكاللعنة

ويا محلاها ها اللعنات

بشوفها عنيكي كالنجمات

وواقفه تطل مـ السماوات

وأنادي بأعلى صوت فيا

يا أهل الشمس يا عاليين

لأهل الارض ليه باصين

يجيني الرد يبسطني

وأسمع إسمي من صوتك

يِِكَِيفني

يكتفني بحبال ودِك

وألاقي الأرض تتمخطر

وألقى الدنيا بتمطر

واجري تحتها مزقطط

وبتنطط !

وأتغرق ! وأنا غرقان بدون مطره

وأحن لصوتك الدافي

وأنا بردان

يهل عليا مـ التليفون

وطالعه حروفه ملهوفه

ويسأل : ها عملت إيه ؟

أرد واقولها : مشتاق

ودايرة دماغي مـ الدوخه

وأفضل أحكي عن شوقي

وتفضل ساكته مكسوفه

يا بنت الإيه

قاتلني الجرح فـ عنيكي

شوية حزن سكناهم

ودفناهم برمش العين

وسقياهم بُكا ودموع

بقوا زي الختم عالخدين

وساكنك ليه وجع وأنين ؟!

ما تنسيهم ..

ما تنسيهم

وأهو نسافر بعيد عَنيهُم

وينسوكي

وتبقي معايا .. وأصونك

وعهد عليا ما أخونك

ولا تخوني ..

واسكن وحدي في عيونك

ولا عنيكي بينسوني

يا بنت الايه

ولا انسى

.